CHORO KE HAUSLAE BULAND NAHI,
BALKI POLICE KI DHILAAI BULAND……..

Parso guruvaar (24.july.09) subeh 2-3 baje ke beech ko Sri Ganganagar main phir se ek badi chori ki ghatnaa ho gayi. Iss baar choro kaa nishaanaa banaa shaher ka prem nagar. Iss chori main kareeb 80000 rupees kaa gold neck-lace hi chori hua hain. Haalaanki iss baar ki chori main choro ke haath jyaadaa kucch nahi laga hain, par chor dehshatt-bhay failaane main jaroor kaamyaab ho gaye hain. Isi prem nagar ilaake main 20.june.09 ko bhi chori ki ek badi waardaat hui thi. Tabb choro ne toh kareeb 6 laakh rupees ke saath-saath 350 gram gold kaa maal bhi paar kar liya tha. Uss chori ne toh purae shaher ko hi hilaakar rakh diya tha.

Yahaan maamlaa isliye bhi gambheer hain ki dono hi choriyaan ek hi area main or ek hi tareekae se ki gayi hain. Dono hi choriyaan ghar ke baahar waale room ki gril kaat kar ki gayi hain. Ghar main gril kaat ke enter hone ke baad, chor saaraa kaam bilkul shaanti-aaraam se karte hain. Sotae huye logo ke takeeye ke nichae se cheez chori kar lete hain, lekin logo ko subeh uthne ke baad hi chori ka pata chalta hain.

Chor chori karne kaa time bhi aisa choose karte hain jis waqt log gehri neend main so rahe hote hain. Chor yeh baat achchhi tareh se jaantae hain ki log late raat ko jaagte bhi honge toh bhi jyada se jyada 2 baje tak or subeh jaldi bhi uth jaate honge toh bhi kam se kam 4 baje ke baad. Yahi weh time hota hain jab koi zabardast gehri neend le raha hota hain. Or isi samay main chor apna kaam kar jaate hain.

Chor itne jyada expert ho gaye hain ki police ko saal baad bhi choro kaa koi suraag nahi milta hain. Waise toh shaher main bahut si choriyaan hui hain lekin latest badi chori yahi 2 hui hain. Aam logo main kaafi jyaada darr kaa maahol paidaa ho gaya hain. Logo ka police security se hi vishvas uthne laga hain. Chor bhi yahi chaahte hain ki logo ka police par se bharosaa uthae or un main darr paidaa ho.

Khaer yeh toh baat thi shaher main huyi choriyon ki. Ab baat karte hain ki log kitne jaagruk hain???? Waise main iss bahas / debate main nahi paddnaa chaahta hoon. Kyonki agar main kahungaa ki log jaagruk hain toh police kahengi ki chori kyon hoti hain??, or agar main kahungaa ki log jaagruk nahi hain toh police kahengi ki ab hum kya kar sakte hain??. Agar main kahunga ki police kucch kar rahi hain toh log kahenge ki chor abhi tak kyon nahi pakde gaye??, or agar main kahunga ki police kucch nahi kar rahi hain toh log kahenge ki kyon nahi kar rahi hain??

Isiliye main iss vivaad-debate main ulajhnaa nahi chaahta hoon.

Main toh sirf ek hi baat kahunga ki-“log choro ke prati apnaa statement change kare. Jab bhi kahi chori ki koi waardaat ho jaati hain toh log-baag yahi kehte hain ki-“choro ke hauslae buland ho gaye hain.” Yahi par log galti kar rahe hain. Log yeh kehte hain ki choro ke hauslae buland hain, balki logo ko toh yeh kehnaa chaahiye ki police ki dhilaai buland hain. Meri nazar main yeh ek badi bhool hain.

Main maantaa hoon ki choro ke hauslae buland hona or police ki dhilaai buland hona ek hi baat hain. Lekin agar aap gor karenge toh aap bhi samajh jaayenge ki main kya keh raha hoon??. Dar-asal baat toh ek hi hain, lekin kehne kaa bhaav-arth alag ho jaata hain. Hame apni baat, apnaa gussa kuchh alag tareeke se kehnaa chaahiye. Hame choro ke hauslae buland hain ki jageh yeh kehnaa chahiye ki police ki dhilaai buland hain.

Zaraa sochiye ki =
1. Agar aap yeh kehenge ki choro ke hauslae buland hain. Toh ek tareh se, indirectly aap choro ki taareef kar rahe hain. Chor bhi asal main yahi chaahte hain ki aap unse darae or unke lohaa maane.
2. Agar aap yeh kehenge ki police ki dhilaai buland hain. Toh police uss par soch-vichaar, manthan jaroor karengi. Police kaa dhyaan bhi aapki baat ki taraf jaroor jaayegaa.

Baat dono ek hi hain, dono baaton kaa arth-meaning ek hi hain. Lekin dono baaton main ek gehraa farak bhi hain. Agar uss farak ko mehsoos kiyaa jaaye toh aap bhi maanenge ki main galat nahi keh raha hoon. Agar aap upar diye gaye 2 options par dobaara nazar daalenge toh aapko kaafi kucch samajh main aa jaayega.

Agar aap pehlaa option choose karte hain, toh iska arth hua ki =
1. Aap choro ki taareef kar rahe hain.
2. Aap choro ke hunar-hoshiyaari ko saraah rahe hain.
3. Aap maan rahe hain ki choro se aap darr rahe hain.
4. Aap maan rahe hain ki chor kucch bhi kar sakte hain.
5. Aap choro ko police ke mukaablae majboot, tez, or shaatir maan rahe hain.
6. Aap maan rahe hain ki choro kaa mukaablaa police nahi kar sakti hain.
7. etc.
Or sabse badi baat yeh hain ki-“aap maan rahe hain ki aap kamjor hain or sirf police ke sahaare baithae hain.”

Agar aap doosraa option choose karte hain, toh iska arth hua ki =
1. Aap police ki hauslaa-afjaai kar rahe hain.
2. Aap police ko kucch karne ke liye prerit kar rahe hain.
3. Aap police ke saath hain.
4. Aap police ko tez, shaatir, or majboot maan rahe hain.
5. Aap police ki har-sambhav help karne ko taiyaar hain.
6. Aap maan rahe hain ki police choro ko har haal pakadd legi.
7. Aap hamesha police ke saath hain or aapko koi darr-bhay nahi hain.
Or sabse badi baat, isse choro main yeh message jaayegaa ki logo ka police main puraa vishvas hain. Logo main bilkul bhi darr-dehshatt nahi hain or log har-sambhav police ki help kar rahe hain.

Bas yeh message choro tak pahunchte hi aadhi ladaai-jung toh aam janta aise hi jeet jaayegi.

Ab yeh aap sab logo ke upar hain ki aap kaunsaa option choose-pasand karte hain??, pehle waala yaa doosre waala????. Mere khyaal se toh doosrae waala option jyaadaa better hain. Baaki aap logo ke upar hain.

Main to yahi kahunga =

CHORO KE HAUSLAE BULAND NAHI,
BALKI POLICE KI DHILAAI BULAND……..

Thanks.

FROM =
CHANDER KUMAR SONI,
L-5, MODEL TOWN, N.H.-15,
SRI GANGANAGAR-335001,
RAJASTHAN, INDIA.
CHANDERKSONI@YAHOO.COM
00919414380969
CHANDERKSONI.BLOGSPOT.COM