SAMAAJ SEWA OR BUSINESS KAA SU-MEL..........

Ji haan friends, aapne bilkul sahi title padhaa hain. Yeh baat sochne main ajeeb lag sakti hain par hain 16 aane / 100 percent sach. Business or social work kaa bhi mel ho sakta hain. Balki main toh kahungaa ki-“inn dono kaa mel nahi balki su-mel ho sakta hain.” Waise toh business line or social work line kaa koi khaas mel nahi hain, lekin agar koi business man kamaanae ke saath-saath or kahi nazar daale toh usae social work karne kaa raastaa nazar aa sakta hain.

Aam tor par maanaa toh yahi jaata hain ki business karne kaa matlab / maksadd paisa kamaanaa hi hain. Vishesh kar hamaare hindustaan main jo business ki padhaai hain, usme yen-ken-prakaaren (kisi bhi tareh se, jaise marji) paisa kamaanaa hi sikhaaya jaataa hain. Yahaan padhaai chhoti classes tak toh naitik, dhaarmik, or moolyo ki hoti hain. Lekin badi classes or college classes main toh yeh saari baatein bhoolaa di jaati hain.

Chhoti classes main toh kaafi achchhi-achchhi baatein (maan, sammaan, naitik, dhaarmik, or saamaajik moolya) bataai jaati hain, lekin durbhaagya se badi classes main toh theek ulat shikshaa di jaati hain. Aaj aap kisi bhi college student se poochh lijiye, weh bata dega ki puraani or nayi classes ki padhaai main kya fark hain????

Doston, pehle unhe chhoti classes main behatareen shikshaa dekar neew bhari jaati hain or badi classes main dhann kamaane ki shikshaa dekar manzil / imaarat khadi ki jaati hain. Lekin mujhe yeh samajh main nahi aa raha hain ki =
01. chhoti classes main neew bhari jaati hain moolyo ki, or badi classes main manzil khadi ki jaati hain paisa kamaane ki??
02. chhoti classes main jo padhaaya gaya hain, weh badi classes main aate hi theek ulat kyon ho jaata hain??
03. kya chhoti classes main galat padhaayaa jaataa hain??
04. yadi haan toh kyon galat padhaayaa jaataa hain??, kyon isme waqt jaayaa kiya jaataa hain??
05. yadi nahi toh kyon badi classes main theek ulat ho jaataa hain??
06. kya kisi bhi tareh se paisa kamaanaa sahi hain??
07. moolyo se bhari neew par kya paise ki imaarat tik paayegi??
08. jab moolya hi nahi rahenge toh kya kamaayaa gaya dhann haraam-gandi kamaai nahi hogi??
09. naitik-dhaarmik moolyo ki shikshaa badi classes main kahaan kho jaati hain??
10. dhaarmik-naitik-or samaajik moolyo ke binaa kamaayaa gaya paisa sahi jageh kaise jaa paayegaa??
11. aisa paisa toh galat-burae kaamo main hi lag sakta hain. Kya isse apraadh / crime nahi badhegaa??
12. kya moolyo ke saath kamaayaa gaya dhann nishchit roop se sahi jageh nahi lagegaa??
13. etc.

Padhaayaa toh yeh jaanaa chaahiye ki-“moolyo kaa dhyaan rakhte huye paisa kamaayaa jaaye. Par hakikat main aisa ho nahi raha hain. Yadi maan bhi liya jaaye ki jaise-taise paisa kamaanaa, dhann jodnaa sahi hain. Toh kya aisa paisa moolyo ko binaa jaane sahi jageh lag sakta hain?? Or sabse bada sawaal, jab paisa moolyo ke binaa sahi jageh nahi lagegaa toh kyaa isse crime nahi badhenge?, etc.”

Doston, main yahaan saaf kar dena chaahungaa ki – “kehne ko toh duniyaa bhar main sabhi crime paet / bhookh ke liye hote hain, par sab jaante hain ki paise waala bhookhaa nahi so sakta hain. Saaf hain ki paisa nahi hoga toh khaanaa nahi milaegaa. Crime hote hi paise ke liye, paise ke chakkar main hain. Isliye saaraa kaa saaraa paisa sahi jageh jaanaa chaahiye. Aisa tabhi hoga jab paisa-dhann naitik-saamaajik moolyo ke saath kamaayaa jaaye. Moolyo ke saath kamaayaa gaya dhann nishchit roop se sahi jageh hi lagegaa. Aise main crime rate down hona pukka hain.”

Isiliye main chaahtaa hoon ki-“bharat main paisa moolyo ke saath kamaanaa sikhaayaa jaaye, aisa dhann nishchit roop se sahi jageh hi lagegaa.” Iske saath-saath paisa sahi jageh lagaanaa bhi sikhaayaa jaanaa chaahiye. Abhi tak bharat main paisa kamaanaa or badhaanaa hi sikhaayaa jaataa hain. Waise bhi, aisi padhaai kis kaam ki jo paisa (kamaane / kharchne) or moolyo (naitik-saamaajik) kaa aapas main taalmel naa baithaa sakae.

Paise ko moolyo ke saath kamaanae kaa toh pata nahi, par paise ko sahi jageh kaise lagaanaa hain????, yeh jaroor aap mr.bill gates se seekh sakte hain. Paise aap kaise kamaate hain?, yeh jaananaa jaroori nahi hain. Jaananaa yeh jaroori hain ki-“aap paise kaise lagaate / kharch karte hain??” Waise bhi kisi ne theek hi kaha hain ki-“paise kamaanae se jyaadaa kharch karna aana chaahiye.”

Doston, paise ko sahi jageh kharch karna aapko mr.bill gates se behtar kaun sikhaa sakta hain?? Mr.bill gates koi nayaa-anjaanaa naam nahi hain. Computers ki duniyaa kaa baadshah or microsoft corporation kaa founder-sansthaapak mr.bill gates hi hain. Duniyaa ke sabse ameer / richest logo ki list main picchhle kai saalo se pehle number par kabzaa mr.gates kaa hi hain. Inke baare main jitnaa kahaa jaaye kam hi hain. Abhi kal hi unhe bharat ki rashtrapati (president) ne indira gandhi puraskaar (prize) diyaa hain. Mr.gates kaa ek charity foundation hain, jiske dwaaraa weh kaafi donations / helps karte rehte hain. Unke charity works ke liye hi unhe yeh prize milaa hain. Health or education par unka main focus raha hain. Yehi weh do main fields hain jahaan par mr.bill gates kaafi charity work kar rahe hain. Saari duniyaa bhar main polio ke khaatme ke liye inka foundation 17% se jyaadaa amount donate karta hain. Bharat main bhi aids ke khaatme ke liye inka hi foundation badi amount kharch kar raha hain.

Mr.bill gates apne foundation-sansthaa ke dwaaraa apna bahut saa dhann charity works main lagaa rahe hain. Sabhi ameero or business mans ke liye gates ek role model hain. Sabhi business mans or millionaires ko unse kucch seekhnaa chaahhiye. Mr.bill gates ki kamaai par sawaal uthaaye jaa sakte hain, unki niyat par shak kiya jaa sakta hain, kai keh sakte hain ki kaali kamaai ko white kar rahe hain, etc. par weh paisa toh sahi jageh lagaa / kharch kar rahe hain. Mr.gates apna bahut bada paisa education or health par kharch rahe hain. Weh chaahe toh iss paise ko kharch karne ki jageh kahi invest karke crores kamaa sakte hain. Par nahi weh aisa karne ki jageh isae kharch kar rahe hain. Unke foundation ki khaasiyat yahi hain ki-“donation karne ke saath-saath weh yeh bhi su-nishchit karte hain ki paisa sahi haathon main pahunchae.”

Kucch logo ki nazar main unhone paisa chaahe galat tareeke se banaayaa hoga yaa bina moolyo ke kamaayaa hoga?, par lagaaa toh sahi jageh rahe hain. Unka paisa moolyo main lag raha hain. Yahi bahut hain. Or isliye main maantaa hoon ki-“unpar koi aarop lagaaanaa galat hain. Hame toh unse prernaa lete huye apni kuchh kamaai paropkaar-samaaj sewa main bhi lagaani chahiye.”

Aao hum or aap sab milkar mr.bill gates se prerit hote huye / prernaa lete huye sankalp le ki-“pehli baat toh hum paisa bina-moolyo ke nahi kamaayenge or agar kamaa bhi liyaa toh kucch hissaa (part) unhe moolyo (paropkaar-samaaj sewa) main lagaayenge. Chaahe weh gareeb ko daan de kar ho yaa gareeb bachcho kaa school banwaa kar. Chaahe weh dharam-shaalaa banwaa kar ho yaa kua (well) khudwaa kar ho. Yaani jo bhi ho-jaisa bhi ho, apni kamaai kaa kucch hissaa samaaj sewa-paropkaar main har haal lagaanaa hi hain.”

Yakeen maaniye jab aap aisa karenge toh samaaj sewa or business kaa su-sangam sach main hi saakaar ho jaayegaa.

Thanks.
FROM =
CHANDER KUMAR SONI,
L-5, MODEL TOWN, N.H.-15,
SRI GANGANAGAR-335001,
RAJASTHAN, INDIA.
CHANDERKSONI@YAHOO.COM
00919414380969
CHANDERKSONI.BLOGSPOT.COM