KHUD HATAAIYE APNE DILO PAR SE BOJH......
Kal guruwaar, 23.july.2009 kaa din sri ganganagar (raj.) ke itihaas main amit syaahi se likhaa jaayega. Kaaran bhi kam important nahi hain. Aakhir aaj collectorate or ganga singh chowk area se sabhi kabze hataa diye jaayenge. Jin logo ke kabze hatenge weh yeh din ujadne ke kaaran, kabhi nahi bhool sakte. Or aam jan kabze hatne se raahat milne ke kaaran, kabhi yeh din nahi bhool sakte.
Yeh sabhi ke sabhi kabze-atikramann kareeb 30-35 saal puraane hain. Collectorate ke baahar, or ganga singh chowk area kabzo ke liye baddnaam hain. Collectorate, vakeelo ke chambers, bar sangh office, district court, head post office, nagar parishadd, zilaa parishadd, bsnl exchange, s.p. office, income tax department, etc sabhi pramukh sarkaari offices yahi ganga singh chowk par hain.
Inhi daftaro ke ird-gird kabzo-atikramanno ki bharmaar hain. Kabze bhi 100 ke paar hain. Kahi tea stall, chhole-kulche, samosaa-namkeen, jardaa-paan, etc ke khokhae, toh kahi photostat, fax, std pco, certificate-forms, etc ke khokhae hain.
Yeh sabhi ke sabhi khokhae khoob chalte hain. kyonki saare din inn sarkaari offices-departments main logo ki chahel-pahel lagi rehti hain. yeh sabhi kabze-atikramann aam jan ke liye kaafi upyogi hain. Inn kabzo ke khokho se aam aadmi ki kaafi jaroortae purii ho jaati hain.
Lekin abhi kucch hi dino pehle ek judge dwaaraa inn atikramnno ko hataane kaa aadesh nagar parishadd or prashaashan ko diya gaya tha. Bas, tabhi se inn sab kabzaa-dhaarion main zabardast haddkamp machaa huya hain. Apne kabzo ko tootne se bachaane ke liye kaafi haath-pair maare. Koi kisi netaa ki sharan main gaya, toh koi kisi afsar ke paas gaya, koi aadesh dene waale judge ke paas gaya, toh koi prashaashan ke aala adhikaariyon ki sharan main gaya. Par durbhaagya se sab taraf se niraashaa-hataashaa hi mili. Ab sabhi kabzaa dhaari upar (bhagwan) ki taraf dekhkar, kucch chamatkaar ki aas lagaaye baithae hain.
Doosri taraf aam aadmi inn kabzo ke tootne ki kaamnaa kar raha hain. Aam aadmi inn kabzaa-dhaarion ki taraf sahaanubhuti toh rakhtaa hain, lekin kabzaa tootna hi chaahiye yeh bhaawna bhi balwati hain. Aam jan inn kabzo ke tootne kaa intazaar kar raha hain, taaki inn kabzo se ho rahi pareshaanion se nijaat- mukti mil sakae. Aam jan bhalae hi sahaanubhuti prakat kar raha ho, lekin usne saaf sanket de diye hain ki--“prashaashan iss baar apne kadam picchhe naa hataaye.” Aakhir saare shaher main kabzo-atikramanno ki bharmaar hain, aise main shaher ke kucch, lekin mahattavpurn, ilaake main kabzo se raahat milae toh bhi badi baat hain.
Inn kabzo-atikramnno ke baare main sabhi ke apne-apne kyaas hain. Koi kehta hain ki kabze nahi hatenge, toh kisi ka vichaar hain ki kabze aadhe hi hatenge, koi maanta hain ki kabzo ko sthaai-permanent yaa lease par kar diya jaayega, toh kisi ka vishvas hain ki kabze har haal main or purii tareh se hatenge. Kaiyo kaa toh yahaan tak kehna hain ki-kabze purae shaher se hatenge, yeh toh sirf shuruaat hain. Waise yeh kaiyo ka acchha vichaar hain ki kabze hataane chaahiye, or saath main yeh bhi su-nischit karna chaahiye ki dobaara koi kabza naa ho. Aam-jan ke kya vichaar hain or kabzaa-dhaarion ke kya vichar hain????, yeh toh aap sab samajh hi gaye honge.
Ab inki kaamnao, ichchhaao, vichaaro, or kyaaso kaa kya hoga??, yeh to bhawishya ke garbh main hain. kabzae hatenge yaa rehenge??, aam jan jeetaega yaa kabzadhaari jeetengae??, yeh sab bhi future hi bataayega. Filhaal toh intazaar karne ke alaawaa or koi raasta bhi nahi hain.
Yeh toh baat thi sarkaari jameeno-sadko par kabze-atikramanno ki. Ab baat karte hain, apne dilo par huye kabzo-atikramnno ki. Zara yahaan dhyaan de ki main unhi kabzo-atikramanno ki baat kar raha hoon =
1. jo janam se hi aapke dilo par hua hua hain.
2. jo ki sabse bada or nuksaandaayak kabza hain.
3. jiska sirf aapko hi pata hota hain.
4. jisae sirf or sirf aap hi hataa sakte hain.
5. jisae aap hataane ke baad chaahe toh dobaara hone se rok sakte hain.
6. jiski aapko sabse jyaadaa pidaa-takleef hoti hain.
7. jiske khilaaf aap hi kucch kar sakte hain, kaanoon yaa koi or kucch nahi kar sakta.
8. etc.
Ji haan, aap bilkul sahi or correct samjhe hain. Main unn kabzo ki baat kar raha hoon jo bhaawnao, apraadh-bodh, darr, negative thinkings (nakaaraatmak soch), burae vichaaro, or tension (chintao) ke roop main hamaare dilo main maujood hain. Doston ab kucch samjhe??, yahi weh cheezein hain jo ki hamaare dilo main bahut gehraai tak ghuus chuke hain. Inn chintao, bhaawnao, darr, negative thinkings, burae vichaaro, or tensions ko hi hum hamaare dilo ka kabza-atikramnn kehte hain.
Doston, sach bhi yahi hain. Hamaare inhi dilo ke kabzo or atikramnno ko hum aam bolchaal ki bhaashaa main dil par bojh bhi kehte hain. Yahi dil ka bojh hi asal main hamaare dilo par hua atikramnn-kabza hain. Iss kabze se mukti paana koi muskil, hard kaam nahi hain, bas majboot ichchha shakti ka hona jaroori hain. Jab tak hamaara iraadaa pukka nahi hoga tab tak hum dilo ke iss bojh ko kabhi bhi halkaa nahi kar paayenge yaa yu kahiye ki dilo ke iss kabze ko nahi hataa paayenge.
Hamaare dilo par yeh kabza-atikramnn yaa bojh kai roop main hota hain. Jaise :-
01. kisi competetion, exam main fail hone ka darr.
02. kucch darr jaayaj hain. Par shuru karne se pehle hi business nahi chal paane ka darr.
03. baar-baar burae vichaar aana.
04. kisi bhi yaa har kaam, baat main negative thinking, ulte-pulte vichaar aana.
05. chinta kucch hadd tak honi chaahiye. Par bae-wajeh, bina kaaran chintaa hona.
06. binaa sachchaai jaane, ulta-pulta soch lena.
07. koi kaam, business, yaa decision lete waqt negative vichaar aana.
08. buri bhaawnao par control naa hona.
09. relations, relatives, yaa friends ki bina wajeh chintaa hona.
10. kisi ko kucch kehne yaa nuksaan pahunchaane kaa apraadh-bodh.
11. etc.
Doston, par diye gaye points toh sirf examples hain. Hakikat main toh list bahut hi lambi hain. Dilo par kabzo-bojho ki list toh itni lambi hain ki purii book hi print ki jaa sakti hain. Yeh dilo ka bojh koi maamuli bojh nahi hota hain. Dilo par hua kabzaa baaki sab kabzo se jyaadaa nuksaandaayak or takleef bhara hota hain. Jab sadak yaa sarkaari jameen par hua kabzaa takleef detaa hain, toh aap samajh sakte hain ki dilo par hua kabzaa kitni takleef detaa hain.
Doston, iss kabze ko sirf or sirf aap hi hataa sakte hain. Isae koi or aadmi yaa kaanoon nahi hataa sakta hain. Aapke dilo ka kabzaa sabse bada or bhaari kabzaa hota hain. Jab sadak yaa sarkaari jameen par hua kabzaa takleef detaa hain, toh aap samajh sakte hain ki dilo par hua kabzaa kitni takleef detaa hain. Yahi dil kaa bojh kai maamlo main heart-attack, blockage kaa kaaran bhi hain. Aisaa kai baar scientists bhi prove kar chuke hain.
Dilo kaa kabzaa baaki kabzo se jyaada bada, bhaari, takleef bhara, or dukhdaayi hota hain. Iss kabze se apne shareer ko bahut saare nuksaan hote hain, especially to heart. Iss kabze se mukti paana koi muskil, hard kaam nahi hain, bas majboot ichchha shakti ka hona jaroori hain. Jab tak hamaara iraadaa pukka nahi hoga tab tak hum dilo ke iss bojh ko kabhi bhi halkaa nahi kar paayenge yaa yu kahiye ki dilo ke iss kabze ko nahi hataa paayenge. Hum haartae sirf isi wajeh se hain ki hamaari ichchha shakti kam majboot hoti hain yaa hamaaraa iraadaa pukka nahi hota hain.
Chaahenge apne dil ko halka karna?,
Chaahenge apne dil ke atikramnno-kabzo ko hataanaa?,
Chaahenge apne dil ko inn kabzo se ho rahe nuksaano se bachaanaa?,
Yadi haan, toh phir aaiye. Hum or aap sab mil kar apne dilo se iss kabze ko hamesha-hamesha ke liye hataa de. Or doosro ko bhi yeh raaste bataaye, jisse unke bhi dilo ke bojh ko halkaa kiya jaa sakae. Kucch raaste =>
01. koi naa koi positive hobby (biking, swimming, gardenning, or may be collecting coins, notes, stamps, etc) jaroor rakhain.
02. koi naa koi sakaaraatmak vichaar-shabd ko apna takiyaa-kalaam (jo aap baar-baar bole) jaroor banaaye.
03. koi naa koi positive time paas / work out jaroor banaaiye. Taaki aapka dhyaan buri baaton, burae vichaaro se hatt jaaye.
04. dogs yaa koi or pets paaliye. Yeh dikhte maamuli hain, lekin aapka mood fress karne main yeh raam-baan bhi saabit ho sakte hain.
05. apne negative thinking-vichaaro waale sabhi jaankaaro, doston, or relatives ko kucch waqt ke liye chhod de.
06. kucch bhi ho, jaisa bhi ho, sada-hamesha bhagwaan main atoot vishvas rakhe. Bhalae hi aap naastik ho, lekin aapka vishvas hi aapki taakat hain.
07. bhagwaan ke prati atal shraddha rakhe or yeh maane ki jo hota hain acchhe ke liye hi hota hain.
08. yeh maane ki bhagwaan aapke saath tha, hain, or hamesha rahega. Filhaal god aapka test le raha hain or aapko uss test main har haal paas hona hain.
09. sachchaai or imaandaari ke sidhdhaant par hamesha chale.
10. jitne sachche aap honge, utne hi saral aap khud honge. Sachcha aadmi jhooth nahi boltaa hain.
11. ek jhooth ko chhupaane ke liye kai jhooth bolne paddte hain. Agar jhooth pakdaa gaya toh alag tension, or agar nahi pakdaa gaya toh pakde jaane kaa darr.
12. maaf karnaa or maafi maangnaa sikhae. Maaf karna bahut mushkil hota hain, lekin maaf karte hi maafi maangne waale ke saath-saath aapka dil bhi halkaa ho jaayega.
13. maafi maangnaa bhi bada mahaan kaam hain. Maafi maangnae se aapko sukoon milta hain, jiske result main aapke dil se anaawasyak kabzaa-atikramnn hatt jaata hain.
14. agar koi aapko maaf naa kar raha ho yaa aap maafi naa maang paa rahe ho toh bhagwaan se hi maafi maang le. Bhagwaan ka dil bahut bada hain, weh jaroor maaf kar denge.
15. apne vichaaro ko jahaan tak ho sakae khule rakhe.
16. apne dimaag ko naye-naye vichaar accept karne ke liye hardam taiyaar (ready) rakhe.
17. apne dimaag ko jaati-dharam-samudaay, desh-videsh-pradesh, bhaashaa-rang-roop, yaa kisi or sankirn vichaaro se naa baandhe.
18. achchha saahitya (books, magazines, newspapers, articles, blogs, newsletters, etc) padhae. Achchha sahitya sachcha friend hota hain.
19. agar koi bimaari ke kaaran burae vichaar yaa buri baatein aati hain toh turant kisi doctor se sampark kare.
20. kisi bimaari ki haalat main yaa suicide jaise negative vichaar aate waqt nadi-naher kinaare yaa kisi unchi jageh-khaai-pahaad, etc ke paas bilkul bhi naa jaaye.
21. koi bhi important decision lene se pehle apne saath-saath sabki soche. Sabki sochte hi waqt ki tasveer hi badal jaayegi.
22. positive sahitya padhae, positive films dekhe, positive khaana-peena (avoid tobacco & alcohol) rakhe, positive friends-relatives rakhe.
23. yaani jitnaa ho sakae apne aas-paas positivity rakhae.
24. buri baaton yaa burae vichaaro ko ek kaagaj par likhe or ek-do baar padh kar usae jalaa de. Yeh ek scientific effect daaltaa hain.
25. achchhe gaane, pyaar bharae gaane, yaa soft music , dheeme aawaaj main sunae. Isse bhi badi raahat milti hain.
26. or last main sabse important, sabse jaroori or sabse badi baat. Upar diye gaye sabhi points ko try karte waqt aapme pukka iraadaa, majboot ichchha shakti, or dridd nishchay hona chaahiye. Tabhi aap apne dilo ko atikramnno-kabzo se mukt kar paoge yaa apne dilo se bojh ko halkaa kar paoge, hataa paoge.
Thanks.
FROM =
CHANDER KUMAR SONI,
L-5, MODEL TOWN, N.H.-15,
SRI GANGANAGAR-335001,
RAJASTHAN, INDIA.
CHANDERKSONI@YAHOO.COM
00-91-9414380969
CHANDERKSONI.BLOGSPOT.COM
No comments:
Post a Comment
सुस्वागतम,
मुझे आपका ही इंतज़ार था,
कृपया बेझिझक आप अपने अच्छे-बुरे, सकारात्मक-नकारात्मक, जैसे भी हो,
अपने विचार-सुझाव-शिकायत दर्ज करे.
मैं सदैव आपका आभारी रहूंगा.
धन्यवाद.